…promé ku bo komprometé bo mes ku empleo. 

Ora ta trata di kontratá empleado, tin algún kos ku bo mester tene kuenta ku ne. Pa hopi empresario e ta un paso grandi den nan negoshi, mirando e echo ku esaki ta representá un obligashon serio. Banda di tin un cash flow stabil pa por paga e salario mensual di e trahadó, un empresario mester kumpli tambe ku e retenshon i pago mensual di primanan sosial i impuesto, manera por ehèmpel impuesto riba suèldu, seguro sosial (AOV, AWW i AVBZ) i seguro di empleado (ZV i OV). E meta prinsipal di e pagonan mensual di seguro sosial i seguro di empleado ta pa kubri e responsabilidat sosial ku e dunadó di trabou tin pa ku su trahadónan.

Tur dunadó di trabou ta obligá na kalkulá, retené i paga e primanan i impuesto ku mester paga di e salario di su trahadónan. Mester paga impuesto riba suèldu i e primanan sosial na Servisio di impuesto promé ku dia 15 di kada luna i e seguro ta paga na Banko di Seguro Sosial (SVB). E reglanan aki ta konta pa tur trahadó, tantu pa esnan ku ta den servisio permanente i esnan part-time.

Pa por kumpli ku e kolekshon i pago mensual di e impuesto riba suèldu i e kontribushonnan sosial, e dunadó di trabou ta obligá na registrá tur trahadó nobo na Servisio di impuesto i na SVB.