Government Institutions
Servisio di Impuesto ta responsabel pa implementashon di lei di impuesto, taksashon i kolekshon di impuesto, i tambe pa registrashon di kompanianan nobo. Despues di nan registrashon na Servisio di Impuesto, e kompanianan aki ta risibí un number di registrashon úniko pa metanan administrativo, e asina yamá “CRIB nummer”. Despues di esaki e kompania ta keda rekonosé komo tal pa Servisio di Impuesto i e ta suheto na pago di impuesto.
Banko di Seguro Sosial (SVB) ta un instituto gubernamental ku un entidat públiko den e ministerio di Salú, Medioambiente i Naturalesa. SVB ta responsabel pa ehekushon di diferente lei di seguridat sosial. Tur dunadó di trabou mester ta registrá na SVB pa por operá un negoshi. Pa por protehá diferente derecho di e trahadó, registrashon na SVB ta obligatorio.
Kámara di Komèrsio di Kòrsou ta representá interés general di e komunidat di komersiante di Kòrsou i alabes ta boga na su nòmber. Tambe e ta suministrá tur dokumento, informashon i servisio di apoyo komersial na kompanianan chikí i otro komersiante.
Lei ta rekerí ku tur kompania i entidat legal mester ta registrá na Kámara di Komèrsio di Kòrsou.
Ministerio di Desaroyo Ekonómiko tin komo meta pa duna direkshon na un desaroyo ekonómiko duradero pa Pais Kòrsou. Ku esaki e ministerio kier realisá un kalidat di bida haltu pa nos komunidat i aparte di esaki stimulá un posishon ekonómiko fuerte i produkshon kompetitivo di kalidat haltu. Ministerio di Desaroyo Ekonómiko lo kier realisá esaki pa medio di servisio optimal, traha na reforsá nos struktura ekonómiko pa asina mehora e klima di invershon i respondé efektivamente riba desaroyonan sosial i internashonal.
Organisashonnan afiliá
Fundashon Marshe a ser funda aña 1997 pa maneho di Marshe Rondo, Marshe di Otrobanda i Plasa Bieu. E marshenan aki ta ubiká den edifisionan i aki nan ta bende diferente produkto. Empresarionan den e marshe ta hur stènt, lokalnan i kushina pa nan por ofrese nan produkto.
For di 2018 Fundashon Marshe ta manehá e barkunan na Sha Capriles kade i stènt na Otrobanda i Punda tambe. E metanan ta:
1. Manehá marshenan den Punda ku Otrobanda.
2. Konektá empresarionan riba tereno di agrikultura i kultura, espesialmente empresarionan chikitu ku ta kreativo i inovativo.
3. Organisá e Marshe di BETH mensualmente
Curaçao Innovation & Technology Institute (CITI) ta un organisashon non-profit dirigí riba promoshon i implementashon di programanan inovativo, mas tantu pa kompanianan chikí i mediano, hobennan i start-ups. Su afan ta pa husa teknología i inovashon komo hermènt pa stimulá desaroyo sosial i ekonómiko na Kòrsou. Hasiendo esaki e ta konsentrá riba mehorashon di e posishon kompetitivo di Kòrsou den región.
Stichting Belasting AccountantsBureau (SBAB) ta un organisashon gubernamental non-profit den e ministerio di Finansas. SBAB ta traha pa mehorá compliance di impuesto di tur kompania ku ta suheto na pago di esaki. SBAB ta traha pa sòru pa tur kompania yena nan formulario di deklarashon di impuesto i paga esaki. Esaki ta e motibu pakiko SBAB ta ouditá kompanianan na Kòrsou.
Organisashonnan di interes (Pa kompanianan)
Asosiashon di Empresanan Chikí di Kòrsou (ADECK) ta un asosiashon pa instanshanan Micro, Chikí i Mediano (MSME). Fundá na 1993, ADECK ta e asosiashon MSME mas grandi den región. ADECK ta representá su miembronan dor di stimulá kolaborashon entre nan, fasilitando nan desaroyo i kresementu, kultivando relashonnan nashonal i internashonal i protehando interes di MSME di Kòrsou.
Vereniging Bedrijfsleven Curaçao (VBC) ta un asosiashon pa komunidat impresarial di Kòrsou. Meta di VBC ta pa protehá interes di komunidat impresarial di Kòrsou pa e kompanianan aki por ehersé nan funshon den komunidat dor di influenshá opinion públiko, maneho polítiko i legislashon ku ta relatá ku e sektor impresarial.