Ora bo kuminsá ku un negoshi, tin diferente impuesto ku bo mester tene kuenta ku ne, manera por ehèmpel impuesto riba volúmen, impuesto riba ganashi i impuesto riba entrada.

Asina ku bo kuminsá ku un negoshi nobo, e direktor (di e NV òf BV) òf e empresario mester registrá e kompania na Servisio di Impuesto (departamento di CRIB) i na Banko di Seguro Sosial (SVB) pa optené e numbernan di registrashon pa asina por paga impuesto i primanan.

E promé impuesto importante ku bo mester tene kuenta ku ne ta e impuesto riba volúmen. Tur kompania ta obligá di retené e impuesto aki riba benta, sin tene kuenta ku e tipo di negoshi òf e struktura legal di e kompania. Normalmente e kliente ta paga e impuesto riba volúmen i e negoshi ta kobra esaki riba balor di e servisio ku e ta brinda. E tarifa pa impuesto riba volúmen ta 6%, 7% i 9%, dependiendo di e tipo di servisio ku e kompania ta brinda. Tene kuenta ku mester paga impuesto riba volúmen tur luna, pa mas tardá dia 15. Esaki por krea un karga atministrativo pisá. Sinembargo, e impuesto riba volúmen mensual no ta keda kalkulá abase di servisionan brindá, pero mas bien abase di fakturanan emití. Esaki ta relatá na volúmen di kompra i benta di e luna anterior. Si e kompania no a bende nada òf no a brinda un servisio, e ta obligá di entregá un deklarashon di impuesto riba volúmen tòg na Servisio di Impuesto.

Tin un eksonerashon pa kompanianan chikí ku volúmen di kompra i benta di Naf. 30,000 of menos pa aña. Pa kalifiká e kompania mester ta stablesí na Kòrsou i mester entregá un petishon.

Un otro tipo di impuesto ku mester tene kuenta ku ne ta e impuesto riba ganashi. Tur entidat legal, manera kompanianan públiko i privá, fundashon i asosiashonnan mester paga impuesto riba ganashi. Ta kobra e tipo di impuesto aki riba ganashi, despues di dedusí gastunan relatá, gastunan di invershon, donashon i e traspaso di pèrdida fiskal ku no a keda husá. E impuesto riba ganashi ta 22%.

Durante nan eksistensha, tur entidat legal ta suheto na impuesto riba ganashi i mester paga esaki tur aña. Pa kada aña fiskal mester paga tantu un rendimentu preliminar (promé ku 31 di mart) i un rendimentu final (promé ku 30 di juni) pa e sigiente aña.

E komersiante mester tene kuenta ku impuesto riba entrada tambe. Tur kompania chiki i kompanianan similar mester paga e impuesto aki. Pa promové i stimulá kresementu di kompania chikí i startups, e impuesto riba entrada ta duna e kompania chikí un insentivo finansiero manera por ehèmpel e regulashon di deskuento di invershon pa komersiantenan ku ta invertí mas di Naf. 5,000 pa aña den aktivo empresarial.

E komersiantenan aki ta risibí un deskuento di 10% riba e montante di invershon inisial. E deskuento aki ta aplikabel pa e aña di e invershon. Den kaso di un invershon den mantenshon òf mehorashon di un monumento, un deskuento mas haltu di 30% di e montante di invershon inisial ta aplikabel. Ta kobra Impuesto riba entrada un bes pa aña riba e entrada fiskal. E entrada fiskal ta e entrada menos gastunan. Tur residente di Kòrsou mester paga e tipo di impuesto aki riba nan entrada. Otronan ku ta traha na Kòrsou pero no ta biba akinan tambe ta suheto na impuesto riba entrada, pero solamente pa e entrada optené na Kòrsou. E tarifanan di impuesto riba entrada ta progresivo, kuminsando na 13% te na un máksimo di 46.5% di e entrada fiskal.