1. Traha un bon businessplan!

Kada kompania ta kuminsá ku un vishon i un idea. Buta esaki riba papel ta e promé paso pa un businessplan eksitoso. Un businessplan ta ehekushon di bo idea i un plan di akshon pa futuro. Formulá un businessplan ta di gran importansha ora di pidi sostén finansiero. Den bo businessplan bo ta husga si bo plan i ideanan ta faktibel. Un businessplan ta evitá ku bo ta lubidá sierto aspekto esensial.

Un businessplan ta kuminsá ku un diskripshon konkreto di bo idea i mas aleu un plan finansiero. E plan aki ta indiká kon bo kompania ta finansiá, manera por ehèmpel kuantu sèn bo mester i di unda e sèn aki ta bini. Un investigashon di merkado tambe ta nesesario pa indiká bo grupo di enfoke, klientenan potensial i kompetidornan. Un businessplan ta di gran importansia pa un kompania nobo; esaki ta mustra si e idea ta faktibel i kiko e perspektiva riba término largu ta. Skibi bo propio businessplan i si ta nesesario laga un hende yud’abo. Abo konosé e plannan i vishon pa bo kompania mihó ku kualke otro persona.

2. Traha un plan finansiero realístiko!

Pa kuminsá ku un negoshi, bo mester di kapital. Si bo mes no tin sufisiente kapital, bo mester buska esaki pa medio di finansiamentu eksterno. Ta fasil pa pensa ku bankonan ta e úniko fuente di finansiamentu, pero en realidat tin hopi otro posibilidat pa rekerí kapital, manera por ehèmpel institutonan finansiero (CDI, Qredits i Korpodeko). Banda di esaki tin posibilidatnan nobo i kreativo tambe, manera crowdfunding. Tene kuenta ku bo no ta limitá na un tipo di finansiamentu eksterno. Un kombinashon di e diferente opshonnan tambe ta un posibilidat.

Un bon plan finansiero ta tene kuenta ku e invershonnan nesesario a base di investigashon. Pa por tin un bon plan finansiero, bo mester kalkulá e benta i gastunan di operashon sperá i alabes tene kuenta ku e proksimo tres añanan. Ora di traha un plan finansiero semper bo mester sòru ku bo ta kapas di paga e obligashonnan finansiero. Esaki ta inkluí e finansiamentu.

3. Skohe un struktura hurídiko

E struktura hurídiko di bo kompania ta dependé di bo situashon spesífiko, e produkto òf servisio ku bo ta ofresé, e meta di bo kompania, si bo ta kuminsá bo so òf ku sosio i si bo ta bai operá lokal òf internashonal. Algun aspekto importante pa tene kuenta ku ne ora di skohe e struktura hurídiko di bo kompania ta e benefisionan fiskal i e pasivo di kada struktura.

Den kaso di un derecho impresarial e benefisionan fiskal ta relativamente faborabel na komienso. Esaki ta pasombra e tipo di kompanianan aki hopi biaha no ta produsí ganashi na komienso i paso e empresario no tin hopi gastu pa e struktura hurídiko aki. Si e struktura hurídiko deseá ta bira un propiedat, abo ta responsabel pa tur e debenan ku e kompania tin. Esaki ta konta tambe den kaso ku bo ta bati bankarota. Den kaso ku bo a kasa den komunidat di bienes, bo partner tambe ta responsabel pa e debenan di e kompania.

Despues ku bo a skohe un struktura hurídiko, por kambia esaki ahinda. Sinembargo, esaki lo tin konsekuensha hurídiko, fiskal i administrativo.

4. Skohe un nòmber di kompania úniko

E nòmber di bo kompania mester ta original, otro i úniko den bo branche i region. Skohe un nòmber fasil i komprendibel ku bo grupo di enfoke por memorisá fasil i ku ta pas ku e servisio ku bo ta ofresé. Pensa riba futuro. E lo ta e nòmber perfekto aki 10 aña ahinda? Konsultá Kámara di Komèrsio di Kòrsou pa kontrolá disponibilidat di e nòmber deseá. Asina e kompania ta registrá na Kámara di Komèrsio di Kòrsou e nòmber ta keda registrá outomátikamente i esaki lo no ta disponibel pa otronan mas.

5. Skohe un sitio adekuá pa e kompania

Un sitio ta sumamente importante. Hopi hende ta balotá e importansha di un sitio perfekto. Depende di e tipo di kompania, un sitio por ta desisivo. Kompanianan chikitu mester por ta den kontakto personal ku nan kliente. Pa e motibu ei trafiko i e aksesibilidat ta faktornan importante, no djis pa e kliente, pero tambe pa e trahadónan i otro servisionan ku bo ta ofresé. Tene kuenta tambe ku e echo ku e sitio perfekto ta bin ku su gastunan nesesario i komo kompania nobo gastunan ta hunga un ròl hopi importante.

6. Registrá e kompania nobo

E promé paso ora di lanta un kompania nobo ta pa registrá esaki na Kámara di Komèrsio di Kòrsou. Despues mester registrá e kompania na Servisio di Impuesto i na Banko di Seguro Sosial (SVB). E kompania no ta kompletamente legal i transparente si e inskripshonnan adishonal aki no a tuma lugá.

7. Hasi un petishon pa pèrmitnan di negoshi

Den sierto kaso lansamentu di un kompania na Kòrsou ta rekerí un pèrmit di establesimentu. Por hasi un petishon pa un pèrmit di establesimentu na Lokèt di Pèrmit i esaki ta keda emití pa Ministerio di Desaroyo Ekonómiko. Outorisashon di establesimentu no ta un obligashon pa tur empresario. Si e persona ku ta kuminsá e kompania a nase na Kòrsou of un di e islanan di loke tabata konosí komo Antias Holandes promé ku 2010, òf na Aruba promé ku 1986, un pèrmit no ta nesesario. Tur otro persona mester sòru pa un pèrmit di establesimentu.

8. Introdusí bo kompania na mundu!

Un di bo prioridatnan komo empresario nobo ta sòru pa mundo sa kiko bo ta ofresé. Mas lihé hende será konosí ku bo kompania, mas grandi e grupo di enfoke i mas tantu kliente potenshal bo por alkansá. Tin diferente manera pa merkadiá bo kompania i asina influenshá e benta. Sierto metódo di merkadeo ta rekerí yudansa profeshonal, pero tin diferente manera mas barata pa merkadiá bo kompania. Awendia ta importante pa bo ta visibel online. Pues, esaki ta un faktor importante ku mester tene kuenta ku ne.

Tin diferente manera barata pa merkadiá bo kompania online, manera por ehèmpel krea un plataforma sosial. SI bo tin e posibilidat di invertí den un wèpsait, BAI P’E! Banda di krea un punto di akseso pa e kliente, un wèpsait ta duna bo kompania mas kredibilidat. Meskos ta konta pa businesscard. Sòru pa semper bo informashon ta up-to-date i ku tur komunikashon ta koherente.

9. Habri un kuenta bankario komersial

Asina ku bo a registrá bo kompania na Kámara di Komèrsio di Kòrsou i na Servisio di Impuesto, e kompania tin derecho riba un kuenta bankario komersial. Esaki ta sumamente importante pa un kompania nobo. Ku un kuenta bankario komersial bo por manehá asuntunan fiskal i práktiko. Na e manera aki fondonan di kompania i fondonan personal ta keda separá.

10. Mantenshon di buki na un manera saludabel

Un bista general di e situashon finansiero di bo kompania ta di gran importansha. Hopi ta balotá e aspekto aki, pero mantenshon di un kompania eksitoso ta rekerí un bon bista di e entrada i gastunan operashonal. Un bon sistema di tene buki ta dun’abo un bista transparente di e situashon finansiero, manera por ehèmpel entrada i gastunan, fakturanan i e montante di impuesto riba volúmen. Entrega di kontrato, faktura i dokumentonan hurídiko tambe ta importante. Dependé di bo abilidatnan i situashon komersial, bo por konsiderá pa laga un kompania eksterno konfiabel hasi e tipo di trabounan aki pa bo.